Quake drills ipahigayon

Mga mayor sa kalungsoran sa probinsiya sa Sugbo giawhag sa mga magbabalaod nga mopahigayon og earthquake emergency drills aron malikayan ang mahitabong disgrasya kun adunay kusog nga linog nga moigo dinhi sa Sugbo sama sa nahitabong linog sa Java, Indonesia nga dunay 6.3 magnitude nga mipatay ug miangol og liboan ka tawo.

Si Bokal Victor Maambong migama og resolusyon alang sa nahisgutang awhag ngadto sa mga mayor sa kalungsoran.

Matud ni Maambong nga posibleng ang nahitabo sa Indonesia mahitabo usab dinhi sa nasud ug ang Pilipinas gikonsiderar nga adunay mga "earthquake faults" nga gitawag og "ring of fire" diha sa Pacific Ocean.

Si Maambong nagkanayon nga kinahanglan nga edukahon ang mga lumolupyo sa kalungsoran sa probinsiya sa labing daling panahon aron andam kini sa posibleng katalagman nga moigo.

Ang awhag ni Maambong gipaluyohan usab nila ni Bokal Agnes Magpale ug Alfred Francis Ouano.

Sa laing bahin, ang maong mga magbabalaod midayeg ni Presidente Gloria Macapagal Arroyo tungod sa pagpadala niini og medical team ngadto sa Indonesia para mohatag og ayuda sa mga nabiktima sa linog.