Washboys sa V. Rama gireklamo

Ang mga lumolupyo sa Calamba kang kansang panimalay nahimutang daplin sa V. Rama Avenue mireklamo sa mikatap nga wash-your-car boys nga anaa manghugas og sakyanan daplin sa karsada.

Ang City Hall ingon man ang kadagkuan sa City Traffic Operations Management nakadawat sa maong reklamo gikan sa mga hingtungdang lumolupyo daplin sa V. Rama Avenue.

Sa iyang bahin, si retired Major Vicente Mercado nga maoy pangulo sa City Hall demolition team, miingon nga dugay ra nilang nalimpyohan ang maong karsada sa mga wash-your-car boys, apan mamalik gihapon sa maong dapit.

Ang mga lumolupyo sa maong dapit gisamukan sa maong mga wash boys.

Tungod sa maong mga tawo nga manghugas sa mga sakyanan, maglinya ang mga sakyanan nga anha magparada daplin sa V. Rama, ilabi na nga ang maong dapit landong kaayo tungod sa dagkong kahoy daplin sa karsada.