DepEd, PRO-7 andam na sa pagbukas sa klase

Andam na ang Department of Education ug Police Regional Office sa Central Visayas alang sa pagbukas sa klase karong Lunes.

Matud pa ni DepEd-7 regional director Carolino Mordeno nga kon duna may mga problema nga motumaw atol sa unang adlaw sa tingklase, dali ra kining masulbad sanglit gamay ra ang maong problema.

Gibana-bana nga moabot sa dos porsiyento ang pagsaka sa gidaghanon sa bag-ong mopa-enrol sumala pa ni Mordeno base sa nasinati sa nangaging katuigan.

Matud pa ni Mordeno nga ang kakuwang sa mga magtutudlo natabangan kini sa lakang usab sa lokal nga kagamhanan sa pagsweldo og magtutudlo ginamit ang ilang lokal nga pondo.

Samtang gipasalig usab sa kapolisan ang paghatag sa seguridad sa kabataan sa mga tunghaan.

Apan nanawagan si Chief Insp. Ferlina Comeros, administrative officer sa PRO-7 atol sa Kapihan sa PIA kagahapon ngadto sa mga ginikanan nga moabag usab sa kapolisan aron luwas ang ilang kabataan.

Matud pa ni Comeros nga nag-organisa sila og mga sibilyan nga moabag kanila ilabi na sa pagpahapsay sa trapiko sa kadalanan diin molabang ang kabataan.

Gidugangan usab ang police visibility duol sa mga tunghaan sumala pa ni Comeros.

Nakig-alayon usab ang kapolisan ngadto sa kadagkoan sa mga tunghaan alang sa paghatag sa seguridad sa kabataan pinaagi sa pagtaho dayun ngadto sa mga awtoridad kon dunay problema nga kinahanglan nilang tubagon.

Samtang giklaro ni Mordeno nga Marso pa nangandam na sila sa pagbukas sa laing tuig tingklase pinaagi sa Brigada Eskwela diin gihimo ang pagpang-ayo, pagpanglimpyo ug pagpanindot sa mga tunghaan.

Gipasalamatan ni Mordeno ilabi na ang mga lokal nga opisyal sa gipakita niining suporta sa pagpangandam sa pagbukas sa klase karong Lunes.