Pag-ban sa disko tabang sa husay nga pista

Pag-ban sa disko sa kapistahan sa lungsod sa Liloan maoy bugtong hinungdan sa kamalinawon sa pagsaulog sa tinuig nga selebrasyon sa Liloan sa milabay'ng adlaw.

Si Liloan Municipal Mayor Ma. Annie Sevilla nga nahinabi sa Banat News miingon nga dili lamang ang disko isip kalingawan sa kapistahan sa lungsod sa Liloan kundi lakip ang mga kabarangayan ang wala niya hatagi og pagtugot nga magpahigayon og disko.

Gihimong basehanan ni Sevilla ang mga panghitabo sa matag disko nga ipahigayon sa usa ka barangay nga mamahimong gubot gumikan sa mga batan-on nga magpinusilay ug magdinunggabay ilabi na ang mga grupo sa fraternity maoy hinungdan sa iyang pag-ban niini.

Atol sa kapistahan sa mahal nga patron sa lungsod sa Liloan nga si Sr. San Fernando Rey sa milabay'ng petsa 29 ug 30 niadtong bulan sa Mayo nahimong nagmalinawon ang maong selebrasyon ilabi na ang mga dagkong kalihukan sama sa koronasyon sa Miss Liloan ug ang concert nga gipasiugdahan og usa ka artista sa telebisyon.

Gumikan niini gipasalamatan ni Sevilla ang katawhan sa Liloan sa ilang kooperasyon sa pagmentinar sa kahapsay ug kalinaw sa ilang kapistahan nga walay mga dakong panghitabo atol sa maong kapistahan.