Duguong pista, usa ang gipatay

Nahimong dugoon ang tinuig nga pagsaulog sa kapistahan sa dihang usa ka 23 anyos nga lalaki ang gipusil patay sa wala pa maiilhing tawo niadtong Sabado 11 sa gabii sa Upper Anajao bukirang barangay sa Argao.

Ang biktima giila sa kapulisan mao si Romulo Pan Rivera, ulitawo, nanimuyo sa susamang lugar, usa ka mag-uuma.

Si Rivera nakaangkon og tulo ka samad pinusilan sa lawas, usa sa walang abaga, ubos sa ilok, usa sa tuong bugan agi sa wala pa matino nga kalibre sa armas nga maoy nakaingon sa pagkamatay niini.

Si PO3 Ely Pelayo sa pakighinabi sa Banat News niingon nga mga 50 metros ang gilay-on gikan sa diskohan, sa kalit lang dihay nipaka nga sunodsunod nga buto sa armas.

Matud ni PO3 Pelayo nidagan pa ang biktima human sa buto-buto aron mangita og kataguan, ug masalbar usab ang iyang kaugalingon.

Ang kapulisan napakyas sa pagpangita sa biktima kay nagtuo sila nga maoy naigo sa pagpamusil, apan tungod sa kangitngit sa maong lugar ug sa dagkong kahoy nga palibot wala igkita ang biktima.

Nianang alas singko sa kaadlawon, nakaplagan na ang lawas ni Rivera sa kamaisan nga nagbuy-od mga 200 metros gikan sa diskohan.