Phivolcs miluwat og pahimangno

Human sa nahitabong linog sa Ilocos Norte ug sa Indonesia sa miaging semana nga nikalas og daghang kinabuhi, giawhag sa Philippine Volcanology and Seismology ang katawhan sa pagpangandam kanunay sa kalamidad labi na gyud kung adunay moigo nga linog sa Sugbo ug silingang mga dapit.

Matud ni Rolando Montanez, Science Research Specialist sa Phivolcs Central Visayas, nga ang katawhan kinahanglang dili maratol kung adunay linog.

Pipila sa iyang gisugyot nga himoon kung adunay linog mao nga kung anaa sulod sa building o balay, gawas dayon o adto sa pinakalig-on nga lugar sa edipisyo.

Alang niadtong namuyo sa duol sa dagat nga nakasinati og kusog nga linog diin maglisod pagbarug ang tawo, bakwit dayon kay posibleng motaas ang dagat nga moresulta sa tsunami.

Giawhag sab ni Montanez ang mga ahensiya sa kagamhanan sama sa Office of Civil Defense, Bureau of Fire Protection, ug uban pa sa pagpahigayon og drill aron ang mga tawo maandam kanunay sa panahon sa katalagman.

Hinuon si Montanez miingon nga ang Sugbo luwas sa tsunami gikan sa gawas sa nasud, apan dili na kini luwas kung ang tsunami gikan mismo dinhi sa Pilipinas o magagikan sa local origin.

Sa nasayran, ang Sugbo katapusang nakasinati og kusog nga linog niadtong tuig 1991 apan wala hinoon kini makamugna og grabeng kadaut sa kabtangan ug kinabuhi.

Ang epicenter sa maong linog didto sa Bohol matud sa maong opisyal sa Phivolcs.