Lactodap mipasigarbo sa ilang programa

Mapasigarbuhon kaayo og dako ang Lapu-Lapu Confederation of Tricycle Operators and Drivers Association of the Philippines, usa ka organisasyon sa mga tricycle drivers ug operators sa Lapu-Lapu, sa ilang gipatumang mga programa alang sa ilang mga miyembro.

Ang Lapu-Lapu Confederation of Tricycle Operators and Drivers Association of the Philippines (LACTODAP) nga gilangkoban og 3,422 operators ug 6,000 members, usa lamang ka umbrella organization sa National Confederation of Tricycle Operators and Drivers Association of the Philippines (NACTODAP) nga moabot ngadto sa three million ka mga miyembro tibuok Pilipinas.

Lahi sa ubang organisasyon, ang presidente sa LACTODAP nga si Felix S. Gila sa dihang nahinabi sa Banat News mibutyag nga aduna sila'y programang hospitalization and emergency medical services sa tanang mga sakop.

Hinuon iyang gipasabot nga usa lang kini ka-voluntary apan gi-encourage sa maong grupo nga moapil gayud ang ilang miyembro tungod sa benepisyo niining madawat.

Ang masakop sa maong programa, dunay dawatunong P30,000 nga accidental death and permanent disabilities, P10,000 para sa burial assistance ug P10,000 para sa unprovoked murder and assault. Apan bisan di miyembro sa insurance, mohatag usab sila og mga hinabang para sa ilang mga miyembro.

Tungod kay gilangkoban man sa kalalakihan ang maong organisasyon, mipahigayon usab sila og family planning pinaagi sa natural o modernong pamaagi.

Ang kasamtangang presidente sa NACTODAP nga si presidential special assistant for transport and tricycle affairs Ariel P. Lim, maoy usa sa misuporta sa paggamit og contraceptives aron mas di maglisod ang mga pamilya.

"Apan kini dili pinugsanay," matud pa ni Gila.

Dugang pa ni Gila isip usa ka drayber angayang di magpabadlong ang ilang mga miyembro, nunot niini dunay kaugalingong patakaran nga gipatuman ang LACTODAP sama sa pag-imposar og suspension kadtong makalapas sa mga balaod sa trapiko ug kadtong mga pasaway.

"Disiplinado gyud atong mga miyembro sa LACTODAP kay kun dili sila motuman sa balaod sa trapiko, naa sa among by-laws nga amo gayud i-suspend," matud pa ni Gila. Iyang gibutyag nga dili madugay aduna na unya sila'y dress code sa tanang tricycle drivers.

Ang LACTODAP rehistradong organisasyon sa Security and Exchanged Commission sukad pa niadtong tuig 1994. Ang ilang buhatan anaa sa Sergio Osmeña Street, barangay Gun-ob, Lapu-Lapu City.