4-pusher nasikop; 1 ikyas sa raid

Upat ka suspetsadong pusher og shabu nasikop ug laing usa ang nakaikyas sa gipahigayong pagpangronda sa mga otoridad, duha niini ang nahimutang sa watchlist sa kapolisan niadtong Sabado diha sa lungsod sa Medellin ug dakbayan sa Talisay.

Ang mga polis adunay dalang search warrant nga giluwatan ni Judge Fortunato de Gracia Regional Trial Court (RTC) branch 15 dihang mironda kini sa mga balay sa mga suspetsado.

Nagtingkagol sa Talisay detention cell si Cristobal Bacus ug Norberto Cebriana, pulos taga Sityo Hawod, Bulacao, Talisay.

Si Bacus nasakmitan sa kapolisan sa Talisay og usa ka dakong pakete ug medium nga paketeng shabu atol sa gipahigayong pagpangronda.

Atol sa pagpangronda, si Cebriana naatlan nga diha sa balay ni Bacus ug nasakmitan kini og mga shabu paraphernalia nga giputos og plastik.

Ang maong pagpangronda gipangulohan ni Supt. Romeo Perigo, hepe sa kapolisan sa Talisay ug ubos sa ayuda sa Philippine Drugs Enforcement Agency (PDEA) 7.

Sa laing bahin, nagtingkagol sa Bogo detencion cell ang magsuong William ug Gregorio Mercader mga residente sa Canhabagat, Medellin human kini masikop sa grupo sa Provincial Anti-Illegal Drugs Special Operation Task Group (PAID-SOTG) nga gipangulohan ni Supt. Hernan Lungayan apan si Francis, igsuon sa duha nakaikyas sa nahisgutang pagpangronda.

Gibutyag kagahapon sa Banat News ni PO3 Gerly Salimbangon, polis sa Medellin nga ang magsuong Mercader nalakip sa watchlist sa kapolisan sa Medellin.

Matud ni Salimbangon nga kanunay'ng masikop ang mga suspetsado apan makagawas dayon kini tungod kay makabayad man og piyansa.

Si William nasakmitan sa mga polis og duha ka peketeng shabu ug cellphone

Ang mga polis nakasakmit usab gikan ni Gregorio ug opat ka peketeng shabu ug usa ka paketeng shabu gikan sa balay ni Francis.