Duha gipamusil atol sa disko

Nagubot ang gipahigayong kalingawan diha sa Sitio Macabaja, Duljo-Fatima dihang dunay grupo sa mga batan-on ang kalit nga namusil sa usa sa mga nanan-aw ug miangol pa usab sa presidente sa ilang kapilya kagahapon sa kaadlawon.

Parehong nangalandig sa tambalanan ang mga biktimang sila si Henry Navarro, hingkod ang panuigon ug Leonardo Cabatino sa maong insidente.

Gipangita na karon sa kapolisan ang suspek nga naila lang sa pangalan nga Insik Mancao uban sa wala mailhing mga kabarkada niini.

Sumala pa sa imbestigasyon sa kapolisan si Navarro kasamtangang nakig-inom sa iyang higalang si Etchie dela Cerna dihang kalit nga miabot ang suspek ug mga kauban niini ug dayon walay pangutana kalit mipusil kaniya makadaghang higayon.

Naigo si Navarro diha sa dughan diin daling mibiya ang mga suspek pagkahuman sa pagpamusil.

Si Cabatino kinsa maoy presidente sa kapilya sa Sta. Cruz nga kasamtangang nag-roving palibot sa kalingawan nakadungog sa buto-buto apan sa dihang midagan kini aron pagtino sa hitabo nabatyagan nalang niyang duna siya'y igo diha sa walang bitiis.

Si Navarro daling gidala sa Cebu City Medical Center samtang sa usa ka pribadong tambalanan gidala si Cabatino.