Drug pusher sa Suba arestado sa CIIB

Nagtingkagol karon sulod sa bilanggoan ang usa ka 20 anyos nga batan-on human kini madakpi sa mga sakop sa Criminal Investigation and Intelligence Branch sa Cebu City Police Office sa gihimong ronda diha sa Suba, ning dakbayan sa Sugbu niadtong Biyernes sa hapon.

Ang suspek nga gipasanginlang tigpayuhot og gidiling drogas giilang si Michael Badajo alyas Michael Badayos, residente sa maong dapit.

Ang grupo ni Supt. Pablo Labra armado sa search warrant nga giluwatan ni RTC Branch 13 Judge Menrado Paredes misiksik sa balay sa suspek uban sa mga tanod nga sila si Roque Espinosa ug Virgilio Tagsip.

Usa ka bulto nga may sulod nga gidudahang shabu ug mga drug paraphernalia ang nasakmit diha sa panimalay sa suspek.

Kasong paghupot sa iligal nga drogas ug paghupot og gamit pagsuyop niini maoy kasong ipasaka ugmang adlawa diha sa piskalya.