Mediaman maoy gidudahan

Wa ibutyag ni Mayor Socrates Fernandez ang ngalan sa taga media nga gidudahan sa kadaghanang maoy nagpalakaw sa usa ka poison letter" niadtong miaging Biyernes.

Ang maong suwat nga gisabwag didto sa Talisay City hall ug nabasa sa tanang mga kawani nagsaway sa matud pa, mga pamaagi sa pagdumala ni Fernandez sa Talisay uban ni legal officer Aurora Econg.

Laing isyu nga gituki sa maong suwat mao ang giingong kapakyas ni Fernandez pagpahamtang og silot niadtong kawani sa city treasurer's office nga matud pa, nanlimbong sa iyang pagpangoliktag buhis.

Gilakip usab sa maong suwat ang pasangil nga gigamit sa anak sa mayor ang mga sakyanan sa gobiyerno bisan sa mga oras nga dili na opisyal nga biyahe.

Sa sayo pa natahap ang uban nga mugna kini sa mga kawani ra usab sa kagamhanan sa Talisay nga diskontento sa administrasyon karon.

Apan dihang gisukit ni Fernandez ang mga kadagkoan sa kahugpongan sa mga empleyado sa Talisay, nanghimakak kini ug gani mipadayag pa sa ilang pagdayeg sa administrasyon karon.

Gitumbok sa maong mga kawani nga wala silay ikareklamo tungod kay nadawat na nila ang umento sa ilang allowance matag buwan nga P1,000 ug ang "adjustment" sa ilang suweldo matag tulo ka tuig.

Si Fernandez sa iyang kaugalingon walay katahap sa mga kawani nga ubos sa iyang administrasyon tungod kay mitug-an kini sa tinuod, ug gani mapasalamaton kini sa kaayohang nadawat nila karon.