11 Indons ikiha'g smuggling

Ang Bureau of Customs (BOC) Port of Cebu mo-isyu og warrant of seizure and detention (WSD) batok sa kinawat nga Indonesian vessel nga TB Martha dala ang tugboat nga IK Santana.

Sumala pa ni Cebu Customs District Collector Ma. Lourdes Mangaoang nga simpleng smuggling ang kasong atubangon sa onse ka mga Indonesian nga mikawat sa maong barko tungod sa malampusong pagpayuhot sa maong barko dinhi sa Pilipinas.

Si Mangaoang miingon nga ubos sa Tariff and Customs Code of the Philippines walay langyaw nga barko nga gitugotan nga makasulod sa kadagatan sa Pilipinas nga walay clearance o pagtugot sa BOC.

Kun may langyaw'ng barko nga modunggo sa dakbayan sa Sugbo nga walay dokumento, sumala pa ni Mangaoang nga ikonsiderar kini nga smuggling.

Mibahad si Mangaoang nga mopasaka siya og kaso alang sa Indonesians nga maoy nagpayuhot sa barko dinhi sa dakbayan.

Giawhag usab ni Mangaoang ang kapolisan sa pagsumiter og report kabahin sa barko aron mapaubos kini sa iyang hurisdiksiyon.

Kun tinuod ang report sa mga polis nga usa ka Pilipino ang mipalit sa barko ug gidala sa Philippine Shipyard Inc. aron ayuhon, ang nagpalit mismo mahimo usab nga i-apil sa pasakaan og kaso.

Ang siyam ka Indonesian nga sila si Bayu arden Mahardita, David Sarira, Hariyono, Mohammed Firqah, Bornok Ricarde, Hariyanto, Suwandi Siagian, Achmad, ug Daniel nadakpan sa Mako, Davao del Norte.

Sa susamang kalambuan, silang Bernard Labene ug Oscar Labene nga miyayong sa patay'ng lawas ni Johannes Taruc gi-turnover ni Homicide chief Mario Monilar ngadto ni Bureau of Immigration and Deportation direktor (BID-7).

Si BID-7 regional director Leobarlo Enad miingon nga nadawat na nila ang charge sheet alang sa pagpa-deport sa duha.

Ang embahada sa Indonesia mitawag kang Enad ug nagpahibalo nga buot nilang kuhaon ang duha aron ilang pasakaan og kaso sa maong nasud.