Paril sa BBRc gilungagan sa 6 ka pugante

Paril sa Bagong Buhay Rehabilitation Center gibuhoan, unom ka priso mipuga kagahapon sa kaadlawon samtang ang gwardiya wala diha sa iyang poste sa tower two sa maong bilanggoan.

Ang mga mipuga gituohang gipanguluhan ni Randy Rayala, 23, kinsa gikumbikto sa salang pagpatay sa iyang agalong negosyante og softdrinks diha sa Talamban pila na ka bulan ang milabay.

Ang mga kaubanan ni Rayala giila ni BBRC jailwarden Supt. Efren Nemeño nga sila si Randy Java,23, dunay kaso labot sa drugas ug taga Lawis, Pasil ning dakbayan; Edgardo Batanes,26, kaso labot sa drugas taga Ermita; Emeric Abadiano,25, kasong robbery nga taga San Vicente, Bulacao ning dakbayan; Garsol Gabuya,22, taga Poblacion Bulacao ning dakbayan ug Cesar Saban,20, kasong murder nga taga Pardo ning dakbayan.

Sumala pa ni Nemeño pasado alas 4 sa kaadlawon nasigpatan sa roving supervisor nga JO2 Leo Labata ang buslot diha sa bungbong nga nag-atubang sa amihanan tupad sa poste sa tower two nga gibantayan ni JO1 Victoriano Vince kinsa niadtong tungura diha sa tunga-tungang bahin tower 2 ug tower three nga gibantayan usab ni JO1 Freddie Perez.

Dunay himuong imbestigasyon ang BBRC sa duha ka gwardiya gumikan niini sanglit giingong hayag ang gibuslotang bahin sa paril dihang nahitabo ang pagpuga sa mga suspek.

Usa ka tubo ug bato gituuhang gigamit pagtiltil sa gabok nang sementadong paril ang nakit-an lakip na tsinelas diha sa crime scene, ang maong buslot paigo ang usa ka tawo.

Apan si Java gidemalas dihang nasikop sa mi-block nga mga sakop sa jailguards diha sa may JY Square sa Lahug pila ka gutlo human maalarma ang BBRC alas 4 sa buntag kagahapon.

Samtang si Police Coordinating Advisory Council chairman Bise Mayor Michael Rama kinsa tua karon sa Manila sa usa ka interbyu sa lokal nga sibyaanan wala mahimuot sa nahitabo sanglit dunay kasabutan ang Cebu City Police Office ug City hall nga magbutang og sakop sa Mobile Patrol Group nga mobantay sulod sa 24 oras .

Gimando na ni Acting Cebu City Police director Supt. Melvin Gayotin kang chief Inspector Arnel Banzon ang paghimo og imbestigasyon sa kung si kinsa ang mga police nga nakadestino sa maong dapit nianang pagkahitabo.

Mitug-an si Gayotin sa Banat News nga duna siya'y kamandoang magbutang og mobile patrol car sa dapit 24 oras apan miklaro nga ang pagbantay sa mga bilanggoan responsibilidad sa BJMP.

Nakita nila ni Gayotin ug ni Nemeño ang problema sa grabeng kahuyang ug gabok na kaayong perimeter fence sa maong pasilidad ug ang kasaypanan sa mga nagbantay nianang tungura.

Ang BBRC gitukod ug gidesinyo alang lang sa 250 ka mga bilanggo apan sa pagkakaron duna na kini dul-an 2,600 ka mga priso nga naghuot diin ang uban diha na ibutang sa gihimong gagmay'ng selda sa basketbolan.

Ang maong bilanggoan duna ray 81 ka mga gwardiya nga gilangkuban sa mga opisyal ug escorts nga magbanos-banos og bantay sa mga prisong motambong sa court hearings matag adlaw.