CH di na manghatag notebooks

Gikanselar sa kagamhanan sa dakbayan sa Sugbo ang pagpang-apod apod niini og mga libreng school supplies sama sa notebook sa mga tinun-an sa publikong tunghaan nunot niining nagsingabot nga subling pagbukas sa klase sa Hunyo.

Nasayran nga niadtong miaging tuig mibuhi og P5 milyones si Mayor Tomas Osmeña nga gipamalit og mga notebook nga gipanghatag nga libre ngadto sa mga tinun-an sa elementarya ug sekondarya dinhi sa dakbayan aron makatabang sa mga ginikanan nga naglisud sa pagpatungha sa ilang mga anak.

Apan nakahukom si Osmeña nga kanselahon ang pagpanghatag og libreng mga notebook karong tuiga human ilang nadiskubrehan nga daghan sa mga gipanghatag nilang mga notebook sa milabay'ng tuig gipamaligya ngadto sa pipila ka mga tindahan.

Tungod niini, ang gahin alang sa maong katuyo-an karung tuiga gihapak na lang kini aron idugang sa P130 milyones nga ipatukod dugang mga classroom sa mga lain laing publikong tunghaan dinhi sa dakbayan.