Lapinid utok pagparelibo kang Gayotin

Walay lipud-lipod nga gipasanginlan ni Mayor Tomas Osmeña ang hepe sa Human Resource Doctrine and Development sa Campo Crame Chief Supt. Alejandro Lapinid nga mao gyuy utok sa suway untang pagparelibo kang Supt. Melvin Gayotin, ang acting chief sa Cebu City Police Office (CCPO).

Atol sa press conference kagahapon sa udto gitug-an ni Osmeña nga nakakuha siya og kopya sa kamanduan gikan sa Camp Crame nga nagparelibo unta kang Gayotin sugod niadtong Mayo 16 aron ibalhin og destino sa Region 6 sa Western Visayas.

Giklaro hinuon sa mayor nga dili si Lapinid ang personal nga mipirma sa maong kamanduan apan naggikan kini sa maong buhatan nga gidumala ni Lapinid.

Hinuon wala mosaler ang maong lahugay gumikan kay gipugngan kini ni Presidente Gloria Arroyo human makadawat og text message gikan kang Konsehal Sylvan Jakosalem nga nagpahibalo nga nasuko og maayo si Osmeña sa kalit-kalit nga pagparelibo kang Gayotin.

Tungod sa maong kalambuan masaligon si Osmeña nga dili mahilabtan si Gayotin pagka hepe sa CCPO hangtod na sa pagpahigayun sa Asean Summit sa Disyembre.

Apan giangkon sa mayor nga wala siyay kompyansa kang Lapinid gumikan kay iya kining gihulagway nga 'notorious' ilabi na kun kabahin na sa ilegal nga sugal ang hisgutan.

Subling gituki ni Osmeña ang iyang pagparelibo kaniadto kang Lapinid pagkahepe sa CCPO dihang midaog siya og balik pagka mayor niadtong tuig 2001 gumikan sa iyang pagtuo nga dili kini epektibo sa serbisyo.

Gibasehan ni Osmeña ang na-obserbahan niini nga ubos sa pagdumala ni Lapinid sa CCPO wala gyud kini nasikop bisan usa na lang ka video karera machine.

Giklaro ni Osmeña nga wala siya mangayo og special treatment gikan sa presidente kun dili igo lang niyang gipanalipdan ang mga opisyal nga nasuta niyang mihimo sa ilang mga gisangon nga gimbuhaton.