Squatters mitiyabaw

Daghang squatters nga nagpuyo sa karaang sam-ang sa Lorega-San Miguel nabalaka nga papahawaon sila sa ilang gipuy-an kun mahinayon ang housing project sa dakbayan sa Sugbo diha sa maong luna.

Ang ilang kabalaka gipadayag human ang Local Housing Board sa dakbayan sa Sugbo nga gipangulohan ni City Administrator Francisco Fernandez misugyot nga ang karaang sam-ang sa Lorega-San Miguel himuon na nga housing project.

Nahukman sa board nga himuon na lang housing project ang karaang menteryo tungod kay wala na kini kaayo kapahimusli sa kadaghanan.

Nahibaw-an nga kadtong mga tawo nga nakauna sa paglubong sa ilang kabanayan diha sa maong sam-ang, wala na magpapuli sa nahimutangan sa ilang lubong.

Giawhag sa board ang konseho sa dakbayan sa Sugbo nga magpahigayon og public hearing aron sutaon ang sentimento sa kinabag-ang katawhan kabahin sa maong sugyot.

Sa pagkakaron, ang sam-ang sa Lorega-San Miguel hapit na mahurot sa pag-okupar sa mga squatters kay bisan ang tunga nga bahin sa menteryo duna nay panimalay nga gitukod. - Darrel A. Carumba