Killer ni George subling mihimakak

Subling gipanghimakak sa gitumbok nga killer ni George Benaojan ang pasangil nga siya maoy mipusil patay sa maong tigbalita atol sa gihimong pre-trial kagahapon.

Sumala pa ni Dinky Jagdon wala siya sa maong dapit dihang gipatay si Benaojan niadtong Disyembre 1, 2005 sa gabii diha sa South Central Market sa Lawaan Talisay.

Inubanan sa iyang manlalaban nga si Atty. Ramises Villagonzalo mitambong sa pre-trial si Jagdon sa sala ni Regional Trial Court Branch 21 Judge Eric Menchavez .

Ang inahan ni Benaojan nga si Lourdes naghilak nga misugilon sa mga sakop sa media sa iyang pangandoy nga mahatagan sa hustisya ang iyang anak ilabi na nga kagahapon natumong kini sa ika-28 nga adlaw'ng natawhan niini.

Si Jagdon miinsister kagahapon nga inosente siya sa maong krimen gani dihang iyang nakita ang iyang litratong napatik diha sa mga mantalaan ug telebisyon boluntaryo siyang mitahan sa usa ka sakop sa Regional Intelligence Investigation Division (RIID).

Si Jagdon mibutyag nga diha siya sa balay iyang uyoan sa Living Water sa Barangay Pardo niining dakbayan pagkahitabo sa insidente.

Si Fiscal William Canta sa prosekusyon mipasalig sa inahan ni George nga lig-on ang kasong ilang giandam batok sa suspek.

Karong Hunyo siyete niining tuiga sa alas 11:00 sa buntag gikatakda ang marking sa mga ebidensiya. Sa Agusto 10, Septiyembre 14, Oktobre 12 ug 26 niining tuiga gikatakdang trial sa maong kaso.

Ang depensa mipahibalong duna sila'y tulo ka testigos nga ipresentar ug ang prosekusyon adunay lima ka testigos ug tulo niini ang eye-witness nga mao ang pag-umangkon, uyab ug higala ni George nga sila si Leomer Benaojan, Rhea Flores ug Adriano Llanos. intern