Ngalan sa killer nga polis gisulat sa karton

Biktima sa pagpamusil nakasuwat pa sa pangalan sa iyang killer sa ginisi nga karton diin iyang gipirmahan ug gitamlaan gamit ang iyang kaugalingong dugo samtang kini nagtinga.

Usa ka polis sa Mandaue ang gitumbok sa biktima nga mipusil kaniya niadtong milabay'ng gabii diha sa dalan Alviola, Villagonzalo 2 sa Tejero ning dakbayan.

Ang biktima nga si Renato Noble,38, nakaangkon og usa ka samad pinusilan diha sa iyang buko-buko nga milapos sa walang dughan apan nakadagan pa kini pauli sa ilang balay diin siya gisugat sa iyang kapuyong si Tessie Amigo, 27.

Matud pa nga nakasulti pa ang biktima kang Rodillo Noble og "Gipusil ko ni Rey" ug dali siyang gidala sa Cebu City Medical Center apan gideklarar kining dead on arrival sa mga mananambal.

Ang manghod sa biktima nga si Rodillo mitug-an sa Banat News nga dihang nakita niyang himatyunon na ang iyang maguwang mikuha siya og papel ug ballpen ug gipasulat kung si kinsa ang mipusil kaniya.

Ang kapolisan nakadawat og usa ka pinutol nga bahin sa kolor brown nga karton diin dunay nakasulat nga pangalang "Rey Valle" ug "Renato Noble" ug duha ka tamla nga gituuhang gikan sa wala ug tuong kumagko sa biktima.

Wala hinuon dayon mokumpirmar ang Homicide Section kagahapon kun si PO3 Rey Valle ba nga operative sa intelligence section sa station 3 sa Mandaue City Police Office maoy gipasabot sa maong suwat.

Si PO3 Valle miadto sa Homicide Section kagahapon apan dili kini mao ang suspek nga nakit-an sa kapuyo sa biktima nga maoy mipusil kang Noble, niadtong tungura laing polis sa Mandaue Police Station 1 nga si PO3 Esraelito Aballe ang una nang mianha sa Homicide Section ug gipailawom sa paraffin test.

Dihang nakit-an sa duha ka testigo si Aballe positibo kining giila sa kapuyo ni Noble nga maoy tawong iyang nakita sa pagkahitabo.

Si Inspector Mario Monilar ang hepe sa Homicide Section sa pakighinabi sa Banat News mibutyag nga di makunsiderar nga "ante-mortem" statement ang gihimo sa biktima apan ila kining ilakip sa mga ebidensyang isumitir sa korte.

Ang ante-mortem statement sagad makuha gikan sa tawong biktima sa pagpamusil, dunggab ug ubang matang sa paagi sa pagpatay nga diin ang himatyunong biktima atubangan sa testigo mosaysay sa nahitabo ug sa kung si kinsa ang mopatay kaniya ug ang armas nga gigamit dayon iya kining lagdaan o ba kaha tamlaan.

"In fairness sa iyaha (Aballe) ato siyang gipatawag dinhi aron makuhaan og pamahayag unya kay positively identified man siya ato dayong gi-effect ang arrest," asoy pang Monilar sa mga tigbalita kagahapon.

Matud pang Monilar nga ilang ipresentar sa korte ang maong papel isip ebidensya ug ang korte nalang ang bahala kung i-appreciate kini nga "ante-mortem statement."

Si Aballe sa pakighinabi sa Banat News kusganong mihimakak sa pasangil batok kaniya apan miangkong mag-anhaan siya sa maong lugar gumikan kay diha siya magpuyo kaniadtong nagtungha pa siya.

Gihimakak niyang diha siya nianang pagkahitabo gumikan kay sayo siyang natulog aron mangandam sa iyang Physical Fitness Test nga gipahigayon sa Police Regional Office 7.

Dugang pa niya nga boluntaryo siyang miadto sa CCPO aron malimpyo ang iyang pangalan human niya mahibaw-ing siya maoy suspek pagpatay kang Noble, gani boluntaryo usab siyang mipailawom sa paraffin test, kagahapon sa hapon gipailawom usab si Aballe sa drug test gumikan kay base sa pasangil tiggamitan kini og drogas. - Uban sa taho ni Marinelle Martillana