Mass transit system giduso ni Tomas

Giduso og balik ni Mayor Tomas Osmeña ang plano nga mass transit system sa mga sakyanang de pasaheroan nga maggikan gawas sa Sugbo ug molahos sa pagpamasahero dinhi sa dakbayan.

Kini maoy hinungdan nga gihingusgan gyud sa mayor ang pagpanakop sa mga PUJ sa Mandaue Jones nga rota nga molahos sa pagpamasahero sa uptown ug Colon Area subay sa ordinansa nga gipatuman sa Citom.

Gibutyag ni Osmeña nga wala nay atrasay ang pagpatuman nila sa City Ordinance 1837 ug ang nag-amendar niini nga City Ordinance 2072 nga nagdili na sa mga PUJ gawas sa Sugbo pagpamasahero dinhi sa dakbayan ug paghatag og gahum sa City Traffic Operations and Management (CITOM) nga makadakop ug maka-impound sa mga unit niini kun makahimo og tulo ka sunodsunod nga kalapasan sa maong ordinansa.

Hinuon pabiling andam og tagana si Osmeña nga moatubang sa mga drayber sa Mandaue kun ihinayon niini ang gitinguha nga dialogue tali kaniya apan giprangkahan nang daan niya kini nga balik balik na ang maong isyu.

Subling giklaro sa mayor nga ang pagsulbad sa suliran sa trapiko maoy tumong niining pagdili na sa mga PUJ unit sa Mandaue nga makasulod dinhi sa dakbayan hinungdan nga gihingusgan gyud nila ang pagpatuman niining maong ordinansa.

Mipasalig hinoon si Osmeña nga susihon ang bangi karun tali sa mga PUJ drayber sa Mandaue ug sa mga drayber nga sakop sa organisasyon diha sa Ayala ug SM terminal aron mahatagan og higayon ang maong mga drayber nga makapahimulos sa maong mga terminal tungod sa implementasyon sa maong ordinansa.