Ang mga sitio nga naigo mao ang San Pedro Uno, San Pedro Dos ug pipila ka balay daplin sa creek nga nasakop sa Ubos-Pundok. Hinuon walay natahong nasakitan sa maong insidente.
Nagsugod ang maong sunog alas 2:45 sa kaadlawon ug nakontrolar sulod sa kapin usa ka oras diin giisa kini ngadto sa general alarm ni Cebu City Fire Marshal Sr. Supt.Ismael Codilla gumikan sa kagamay sa agianan ug sikit kaayo ang kabalayan.
Ang mga bombero nakasinati og dakong problema dihang pag-abot sa fire scene walay kasudlang kalsada ang ilang mga fire trucks sanglit gikan sa N. Bacalso kun Southroad nagkinahanglan pa ang mga mirespondeng bombero og 166 metros ngadto sa 200 ka metros (base sa accurate geographical information satellite map gikan sa City Hall) nga gisumpay-sumpay nga fire hose aron lang makapaduol sa labing duol nga balay.
Ang labing duol nga dapit diin makaplastada ang mga firetruck mao ra ang compound sa Lorenzo milling nga magkinahanglan usab og sinumpay-sumpay nga 121 ka metros nga fire hose.
Bugtong agianan aron makasulod og dali sa maong lugar mao ang kapin usa ka metros nga gilapdon nga agianan subay sa creek.
Usa ka residenteng tupad sa balay diin magsugod ang kalayo nga gikahinabi sa Banat News kagahapon mibutyag nga nag-away ang managpuyo-puyong sila si Lenny Vallejo ug Elmer Magallo alyas Kingking nianang lawom na ang kagabhion ug nadunggan niya ang tingog sa lalaki nga mihulgang sunogon ang ilang balay.
Pagka kaadlawon diha nay kaguliyang sa ilang palibot tungod kay nagdilaab na ang balay sa nanag-away nga magtiayon.
Laing saksi ang mitug-an sa Banat News nga iyang nakit-ang migawas si Margallo sa balay niini apan dihang iyang giingnan og "Noy ang inyong kisame nasunog"apan wala lang manumbaling si Margallo ug mipadayon og lakaw.
Dugang pa sa laing saksi nga di lang kini ang unang higayon nga manghulga si Margallo nga sunugon ang balay.
Si SFO2 Felix Romero ang fire scene investigator nagkanayon nga layo na kaayo ang anggulo nga nagsugod ang sunog sa electrical fault gumikan kay dugay nang panahon nga walay kuryente sila si Margallo.