Tigbakay himuong ligal

Gipaabot nga mahimo nang legal ang operasiyon sa tigbakay sa mga kabarangayan dinhi sa dakbayan sa Sugbo ilabina sa matag fiesta sa usa ka lugar ka usa sa usa ka tuig.

Kini human subling gitun-an karun ni konsehal Procopio Fernandez ang pagduso og balik sa gipanday niining ordinansahon nga mag-ligalisar sa tigbakay sa mga kabarangayan dinhi sa dakbayan.

Gibutyag ni konsehal Fernandez giduso pa karun niya sa Gamefowl Commission ang maong ordinansahon nga magligalisar sa tigbakay sa mga kabarangayan dinhi sa dakbayan.

Daghang mga report nga nadawat ang konsehal may labot sa gikataho nga pagpangwarta sa pipila ka mga polis gikan niining mga tigbakay nga himoon matag dunay fiesta sa usa ka lugar sa usa ka tinago-tago nga paagi.

Tumong ug tuyo sa pagbanhaw og balik niining maong ordinansahon aron maka-kwarta ang barangay niining maong mga tigbakay gumikan kay molukat na man unya kini og permit ug aron wala nay mga polis nga makapangwarta niini.

Una nang giduso kaniadto ni Mayor Tomas Osmeña ang pagligalisar sa tigbakay ilabina sa panahon sa kasaulogan sa fiesta sa usa ka lugar apan wala mahinayon ang implementasyon niini.

Sa higayon nga mopagawas og paborabli nga opinyon ang gamefowl commission alang sa ligalisasyon sa tigbakay dinhi sa dakbayan subling iduso sa konsehal ang mao niyang ordinansahon sa konseho aron kini ka-aprobahan ug mapatuman.