Prov'l police office mabalhin na sa Consolacion

Paningkamutan sa bag-ong direktor sa Police Regional Office-7, Chief Supt. Silverio Alarcio nga mabalhin na sa permanenting luna ang Cebu Police Provincial Office headquarters sulod sa iyang termino.

Kini ang gipadayag ni Alarcio atol sa iyang kinalit nga pagbisita sa CPPO sa unang adlaw sa iyang katungdanan kagahapon diin ang iyang naabtan mao lang si Supt. Juanito Enguerra, ang hepe sa Provincial Intelligence and Investigation Branch sa CPPO.

Si CPPO Director Vicente Loot ug iyang mga luyo-luyo dunay gipakigtagboan sa mga tinugyanan sa Bigfoot alang sa computerization program sa CPPO ug sa mga police stations sa kalungsuran nga proyekto ni Gobernador Gwendolyn Garcia.

Gipasabot ni Alarcio nga ganahan gyud ang kapolisan nga motrabaho sa hamugaway nga buhatan ug maayo ang ilang pagkapahimutang.

Ang CPPO headquarters duna nay luna sa lungsod sa Consolacion.

Samtang gimandoan usab ni Alarcio ang CPPO nga motabang sa 78th Infantry Batallion sa militar sa pagpakigbatok sa problema sa insureksiyon.

Nasuta ni Alarcio nga kuwang gyud ang gidaghanon sa kapolisan sa Sugbo apan bisan pa niini, iyang gihangop ang paningkamot nga mapatunhay ang kalinaw ug kahusay.