'Namaak' nga tsip nag-sorry

Nangayo'g pasaylo ang hepe sa San Fernando Police Station nga si Police Inspector Ramon "Monching" Ortiz ngadto sa iyang napaakan sa dughan, kagahapong adlawa sa buhatan ni Supt. Daniel Madrio Sales, sa Provincial Internal Affairs Service sa Cebu Provincial Police Office.

Kini human gipatawag ni Col. Sales ang duha sa alas 10 sa buntag tali ni Ortiz ug Filiciano Remiticado, negosyante og sapatos ug sandal sa San Fernando.

Nasayran sa Banat News kagahapon human sa gipahigayong husay diha sa buhatan ni Sales, gibutyag sa asawa sa biktima nga si Merilou Remiticado nga gusto nilang mahilot ra ang problema tali sa iyang bana ug sa hepe nga si Ortiz, aron dili mosangpot sa pagdumot.

Matud pa niya nga dili unta mangayo og pasaylo si Ortiz ngadto kanila, apan ilang giingnan nga andam silang mopasaka og kaso ngadto sa Visayas Ombudsman.

Nidugang si Merilou sa pag-ingon "mangayo ko pasaylo, pero wala kon namaak, pulong pa sa hepe atubangan ni Sales.

Gitataw usab ni Merilou nga iyang hangyuon ang mayor sa ilang lungsod nga kinahanglan mailisan kini og laing hepe ang lungsod nga tarong ug ligdong nga pagkatawo.

Kahinumduman nahitabo ang pagpamaak sa hepe ngadto ni Filiciano niadtong petsa 11 ning bulana sa alas 4 sa hapon sulod sa presinto, human gikomprontase sa naulahi kon unsay ipatuman nga balaod, apan mitumaw na hinuon ang panaglayog ug "namaak" si Ortiz sa dughan.