Polis wa moresponde kay "hadlok" sa NPA

Kapolisan sa Tabogon nahadlok sa mga rebelde hinungdan nga wala kini mag-susi kabahin sa insidente nga nahitabo niadtong Miyerkules sa hapon nga dunay tulo ka magsoon ang naigo sa kilat ug usa niini ang patay diha sa Barangay Kanaw-Kanaw.

Ang maong hitabo wala matala sa talaan sa kapolisan. Kagahapon si Gobernador Gwendolyn Garcia nagkanayon nga ang maong insidente gipa-imbestigar na ni Provincial Police Director Vicente Loot.

Napakyas og kuha og pamahayag ang Banat News kagahapon ni Inspector Wilfredo Giducos, hepe sa kapolisan sa Tabogon kabahin sa maong insidente tungod kay wala kini diha sa iyang buhatan adunay importanteng gilakaw matud pa ni PO1 Alman Acabal polis sa maong lungsod.

Ang mga biktima mao ang magsoong Toling nga si Welito 13-anyos, kinsa patay diha-diha, Junel 11, kinsa nakaangkon og third degree burn sa lawas ug Galiner usa ka tuig ug unom ka buwan kinsa na-trauma sa maong hitabo.

Si Junel ug Galiner daling gidala sa Juan Dosado District Hospital sa Sogod apan tungod sa ilang mga kahimtang gibalhin sa usa ka tambalanan niining dakbayan.

Ang kagamhanan sa probinsiya sa Sugbo mipaabot og tabang sa pamilya sa biktima.