Air Force nawad-an cellphone, kwarta

Sakop sa Philippine Air Force nabiktima sa mga sakop sa Laglag Barya Gang sa dalan A.S. Fortuna, Mandaue kagahapon sa buntag.

Si Technical Sergeant Juan Takata, 46, nagpuyo sa Ibabao, Mandaue nawagtangan sa iyang cellphone ug kuwarta nga P5 mil sa maong gang nga kauban niyang pasahero sa PUJ.

Sumala pa ni Takata nga samtang sakay siya sa PUJ, pag-abot sa maong dapit kalit lang nga may mga sensiyo nga nahulog sa sawog sa PUJ hinungdan nga mitabang siya og pamunit.

Wala siya makabantay nga gikuha sa mga suspetsado ang cellphone ug iyang P5 mil diha sa iyang bulsa hinungdan sa iyang pagtaho ngadto sa kapolisan sa Station 4 sa Mandaue City Police Office.

Sa imbestigasyon ni PO2 Rey Manatad positibo nga giila ni Takata sila si Faustino Cuenca base sa hulagway sa mga bangiitang kawatan nga diha sa rogue gallery sa Station 4.

Si Cuenca lumad nga taga Pagadian City ug temporaryong nagpuyo sa Mandaue, samtang ang duha ka kauban niini wala pa mailhi sa mga sakop sa kapolisan sa dakbayan sa Mandaue.