64 operators sa PUJ Mandaue gikiha

Mokabat sa 64 ka mga operator sa Mandaue Jones nga rota gipasakaan na og kasong administratiba sa City Traffic Operations Management (CITOM) ngadto sa Land Transportation Franchising and Regulatory Board (LTFRB-7).

Kini gumikan sa paghatag og pagtugot sa maong mga operator ngadto sa ilang mga drayber nga makadala sa maong mga sakyanan atol sa gipahigayong rally niini sa atubangan sa buhatan sa Citom ug Cebu City Hall niadtong Miyerkules sa buntag.

Matud ni Arnel Tancinco, executive officer sa Citom nga gikiha nila ang maong mga operator gumikan kay nakabara sa trapiko bali og kapin sa oras ang maong rally sa mga PUJ drayber sa Mandaue gumikan kay gitapok ug gibabag man ang dala niining mga sakyanan diha sa N. Bacalso Avenue ug M.C. Briones atol sa maong rally.

Ang hepe sa Traffic Group Supt. Julius Cesar Gornez maoy nakahipos sa mga pangalan sa mga operator sa mga PUJ nga gigamit sa mga drayber atol sa maong rally nga nag-atubang na karon og kaso sa LTFRB.

Samtang gipahibalo usab ni Tancinco nga kagahapong adlawa pormal nga mipasar sila og resolusyon atol sa tigum sa Citom board nga nagrekomendar sa LTFRB-7 sa pagpahamtang og silot sa maong mga operator.

Tinguha sa Citom nga masilotan gyud ang maong mga operator sama sa pag-revoke sa ilang mga prangkisa tungod sa ilang pagtugot nga gamiton sa ilang mga drayber ang maong mga yunit nga nakabara sa trapiko ug nakahasol sa mga sumasakay nga publiko.

Gitug-an usab ni Tancinco nga pagkakarun halos 80 porsyento na sa mga Mandaue Jones nga rota ang nadakpan ug naisyohan na og citation sulod sa ikatulo ka higayon.

Sa sunod nga higayon nga subli kining madakpan mahimo na kining ipa-impound sa Citom gawas sa bayranang multa niini.

Matud ni Tancinco nga pagkakaron duha pa lang ka PUJ unit sa Mandaue ang nadakpan ug na-impound apan ang usa niini nakuha na sa tag-iya ug usa na lang ang nagpabilin niini karon diha sa ilang buhatan.

Pagkakaron nagpadayon na ang pagpatuman sa City Ordinance 1837 ug ang City Ordinance 2072 nga nagtugot sa Citom pagdakop ug pag-impound sa mga PUJ gawas sa Sugbo nga molahos sa pagpamasahero dinhi sa dakbayan sa Sugbo.