Diver 'palgan dugta na

Ang missing nga usa ka scuba divers sulod sa usa ka semana kapin nakit-an sa usa ka mananagat sa kadagatan sa Sitio Barahan isla sa Kinatarcan, Santa Fe.

Ang nakakita nga mananagat giila mao si Alfiano Montolo, 74, nga taga Kinatarcan Santa Fe.

Ang kapolisan ning lungsod nakadawat og tawag sa telepono nianang buntag gikan sa asawa sa mayor nga adunay nakaplagan nga patay'ng lawas.

Daling mituyo si SPO1 Romeo Placencia, ug miila sa patay'ng lawas niini nga si Uldarico Rodriguez Monte, gumikan kay kompleto pa sa gamit sa diving suite nga nagtangkil sa iyang lawas, lakip na ang tangke sa oxygen.

Si SPO2 Anthony Ellut sa Santa Fe Police Station sa pakighinabi sa Banat News niasoy nga samtang gikan nanagat si Montolo ug modunggo na unta daplin sa baybayon, iyang nakita ang usa ka tawo nga nag-utaw-utaw sa dagat.

Kahinumduman niadtong milabay usa ka semana, si Uldarico Monte ug laing duha pa kauban nipahigayon og scuba diha sa maong lugar, apan kalit lang nabuwag ang biktima sa duha niya ka mga kauban, nga nisawom sa 41 pathoms, nga may giladmon 296 ka tiil, gituohan sa duha ka kauban nga nahutdan sa oxygen si Monte samtang tua sa ilawom, maoy hinungdan nga siya na missing.