300 bigbikes, 200 patrol cars sa PNP kinahanglan

Nagkinahanglan ang kapolisan sa lalawigan og 300 ka mga bigbikes ug 200 kapin nga patrol cars alang sa umaabot panagtigum nga ika-12 nga Association of South East Asian Nations dinhi sa Sugbo.

Si Sr. Supt. Agusto Marquez Jr., ang Regional Investigation and Intelligence Division chief sa Police Regional Office 7 sa pakighinabi sa Banat News kagahapon sa buntag mibutyag nga ang mga motor gamiton alang sa close-in escort sa matag lider sa mga nasud nga mangabot dinhi, dunay gibana-banang 17 ka mga lider sa nagkadaiyang nasud nga motambong sa maong tigum.

Matud pang Marquez base sa "protocol" pag-atiman sa mga bisitang lider sa kanasuran dili momenus unom gyud ka motorbike cops ang moabay palibot sa sakyanan sa matag lider samtang duna pay moabay nga mga patrol cars.

Karong mosunod nga mga adlaw sugdan na ang pagbansay-bansay sa mga polis nga himuong "motorbike cops" nga pasiugdahan sa Police Regional Office 7 ug Traffic Management Group 7 sumala pang Marquez.

Dunay mga sakop sa Central Command ang giplanuhang paapilon sa samang training diin pareho sa mga polis nga makatapos sa training makadawat usab sila og badge nga "helmet" gikan sa TMG.

Dugang pa niini ang pagbansay usab og kapin 350 ka mga "very important person" security kun VIP security nga moporma sa "second ug third ring security" sa matag lider sunod sa mga sakop sa Presidential Security Group ug kaugalingong security service sa matag lider nga ilang kauban.

Matud pang Marquez nga importante kaayong "patas" ang pagtagad sa mga lider nga mangabot aron di mahimong bati sa panan-aw sa mga langyaw'ng nasud ang Pilipinas.

Sa pagkakaron wala pay klarong kumpanya kung kinsa maoy mo-provide sa mga motorsiklo, mga patrol cars sanglit ipaagi pa kini sa bidding apan gisiguro ni Marquez nga "uniform" gyud kini.

Gibanabanang minilyon ang gikinahanglang gamiton sa Pilipinas alang sa maong kalihukan diin dakong bahin niini anha gamiton sa seguridad gumikan sa hulga sa mga teroristang posibleng nagplanong mohimo og kasamok sa maong adlaw.