Overpricing sa school supplies gikabalak-an

Gikabalak-an ang overpricing sa mga nag-unang palaliton ilabi na gyud ang mga school supplies nga gipamaligya sa kamerkaduhan dinhi sa dakbayan sa Sugbo nunot ning nagkaduol nga mga adlaw sa subling pagbukas sa klase karong Hunyo.

Giawhag ni Konsehal Arsenio Pacaña ang Local Price Monitoring Council nga gipangulohan ni City Administrator Francisco Fernandez ug ang Department of Trade and Industry (DTI) nga mohimo ug pakisusi aron malikayan ang maong binuang.

Subay sa gipanday nga resolusyon sa konsehal gi-awhag niini ang maong mga hingtungdang ahensya sa gobyerno sa paghimo og pakisusi ug pag-monitor sa mga kamerkadohan ug mga tindahan nga namaligya og mga school supplies.

Kaniadto pang namatikdan sa konsehal nga sa matag higayon nga magsingabot ang subling pagbukas sa klase dunay ubang mga negosyante nga mopahimulos sa higayon pinaagi sa pagpatuyang og pamahal sa ilang mga baligya nga school supplies.

Gani dunay report nga nadawat si Pacaña nga ang ubang mga tindahan nga i-tamper ang orihinal nga presyo sa ilang baligya aron ilisan kini og mas mahal nga presyo aron modako ang ilang maginansiya, nga kalapasan sa Price Tag Law ug sa Consumers Act .

Nasayran nga mismong si Presidente Gloria Arroyo mipasalig nang daan nga walay mahitabung pag-umento sa presyo sa mga school supplies niining mga panahona aron dili madugangan ang kalisud sa mga ginikanan pagpatungha sa ilang mga anak.