Sikyu sa power corp nagpusil sa iyang ulo

Namatay gayod ang guwardiya sa Pilar Power Corporation sa Lower Poblacion, Pilar, isla sa Camotes kinsa gituohan sa kapolisan nga naghikog pinaagi sa pagpusil sa ulo alas 11 pasado ang takna sa buntag niadtong miaging adlaw.

Si PO1 Abelardo Biton miila sa biktima nga mao si Ricardo Pontillas Silaw, 39, ulitawo ug may kapuyo nga lumad nga taga sitio Toong, sa nahisgotang lugar.

Gitug-an ni PO1 Biton nga duha ka suicide note ang ilang napalgan nga gitungtong sa lamesa sa guard house nga dili usab layo sa gihagbaan sa biktima.

Sumala pa niya nga alang kapuyo nga si Mercy Gocela ang usa ka suicide note nga ilang nakaplagan ug ilang nasayran nga may nahitabong panaglalis nga ang hinungdan mao ang pangabubho.

Ang laing suicide note nga ilang napalgan mao usab ang alang sa iyaan sa biktima nga nag-awhag nga ipakuha ang P2005 nga kuwarta nga atua sa kauban niining guwardiya.

Matud pa ni Biton nga duha ka higayon nga gipusil ang tuong tampihak sa biktima sanglit duha man usab ka kabhang sa bala ang ilang nakita nga nahibilin sa armas nga kalibre .38 nga maoy kargada sa gialagaran niining ahensiya.

Ang mga lumolupyo sa maong dapit maoy dali unta nga nakatabang sa biktima pinaagi sa pagkarga sa pumpboat ug gidala sa labing duol nga tambalanan sa dakbayan sa Ormoc.

Dugang pa niya nga ang mga doktor sa gidad-an niining tambalanan sa dakbayan sa Ormoc maoy nagdeklarar nga milungtad na og pipila ka gutlo nga nakabsan kini sa gininhawa.