Usbaw sa plete sa bus patuman na

Gipahibalo sa presidente sa Cebu Provincial Bus Operators Association (CPBOA) nga si Nick Villahermosa nga hingpit na nilang gipatuman ang usbaw sa pletehan sa mga bus de pasaheroan dinhi sa lalawigan sa Sugbo.

Matud ni Villahermosa nga P6 ang dugang nga gikolekta sa unang lima ka kilometro ug piso ang mosunod nga kilometro.

Gipasabot ni Villahermosa nga igo lang usab silang mipatuman sa kasabutan tali sa iyang grupo ug kang Gobernador Gwendolyn Garcia, nga umentohan ang plete sa mga bus kon moabot og P36 ang litro sa krudo.

Niadtong adlaw'ng Lunes hingpit nang gipatuman sa mga bus operators ang pagkolekta sa usbaw sa pletehan.

Midugang si Villahermosa nga miawhag ang mga bus operators sa kapolisan nga hugot nga ipahamtang ang seguridad sa mga terminals.

Matud niya nga dili lang ang mga pantalan ug ang tugpahanan sa ayroplano ang angayan nga bantayan kun ilakip usab ang mga terminal sa ilang hugot nga pagbantay, tungod kay usa kini sa mga target sa mga terorista nga posibleng butangan og bomba.

Si Villahermosa mitambag na hinuon sa mga drayber ug konduktor nga kinahanglan mag-alerto kanunay ug mo-report gilayon sa kapolisan kun ugaling adunay mabantayan nga kadudahan og linikuhan ingon man mga butang nga kadudahan ug ibilin sa mga bus de pasahero.