Carmen bulk water suplay ipatuman na

Makahatag na og igong suplay sa tubig ang Metropolitan Cebu Water District ngadto sa mga konsumedor.

Kini human pormal na nga gipirmahan kagahapon ang usa ka kasabutan sa pagpatuman sa Carmen Bulk Water Supply Project, ang labing unang proyekto diin ang nagdagayday nga tubig ibabaw sa yuta ang gamiton isip suplay sa MCWD.

Mipirma sa maong kasabutan mao sila si MCWD Board Chairman Juan Saul Montecillo, MCWD General Manager Armando Paredes, Antonio Aquino, presidente sa Manila Water Company; Rey Cometa, presidente sa Stateland, Inc. ug Sherisa Nuesa, chief finance officer sa Manila Water Company.

Gipahibawo ni Montecillo nga ang MCWD Board miaprobar sa mga kondisyon sa maong kasabutan tali sa Ayala-Stateland Consortium alang sa maong proyekto.

Ang Carmen Bulk Water Supply Project gigahinan og P2-bilyones nga pundo ug gipaabot nga makasulbad na kini sa problema sa kakuwang sa supply sa tubig sa MCWD.

Gipadayag sa kadagkoan sa MCWD nga ang maong proyekto maoy malungtarong solusyon sa paghatag og igong suplay sa 1.5 milyones ka mga konsumedor sa Metro Cebu area.

Ang tubig kuhaon sa MCWD gikan sa Luyang River sa lungsod sa Carmen.

Gibanabana mohatag og suplay nga 46-milyones ka litros matag adlaw ang dam nga ugmaron ug ipaagi kini sa 30 kilometros nga transmission pipeline padulong sa Metro Cebu.

Hinuon, ang kontrata iduso pa kini ngadto sa National Economic Development Authority (NEDA) nga maoy mohingpit alang sa pag-aprobar. Gitakda nga kompletong mapatuman ang proyekto sa unang kwarter sa tuig 2009.

Ang NEDA mismo ang miila sa Carmen Project isip usa sa mga proyekto sa kagamhanan aron mapalambo ang ekonomiya sa Sugbo.