2 terorista wa gi-salvage: CCPO

Kusganong gipanghimakak sa kapolisan nga duna sila'y gitago kalabot sa operasyong miresulta sa kamatayon sa duha ka gidudahang mga teroristang Rajah Sulaiman Movement niadtong Huwebes.

Si Supt.Melvin Gayotin isip hepe sa Cebu City Police Office nga may hurisdiksyon sa gikahitaboan mitubag sa mga pangutana'g pagduda nganong wala dayon gipasulod sa crime scene ang mga sakop sa media diin mapatay sila si Ali Usop alyas Datu Ismael Usop ug Datu Niel Ulama alyas Viktor Jimenez diha sa dalan. A. Soriano sa North Reclamation Area pila ka gutlo human sa pagkadiskubre sa bomba diha sa may ganghaan sa SM City Cebu.

Sa interbyu sa Banat News kang Gayotin mipasabot kini nga peligroso pa kaayo alang ni bisan kinsang sibilyan nga pasudlon diha sa crime scene gumikan sa presensya sa granada.

"Ang alarma una is, dunay bomba, dayon taud-taod dunay nahitabong encounter dayon dunay narekober nga granada diha mismo sa crime scene, dili ta makagarantiya sa safety sa mga mediaman," asoy pang Gayotin kinsa mibutyag nga bisan si Mayor Tomas Osmeña wala gani dayon pasudla gumikan usab sa susamang rason.

Matud pa sa mga mirespondeng polis nga nabangil pa ang granada ug wala nakasiguro kun safe ba kini gumikan kay dili maklaro ang safety pin niini.

Samtang usa sa mga opisyal nga miresponde ug maoy nakaengkwentro sa duha ka gidudahang RSM nga si Sr.Inspector George Ylanan kinsa diha sa Tamaraw FX nga gipusil sa mga suspek (dunay igo sa windshield sa drayber nga bahin, pultahan ug na-flat ang ligid sa atubangan) miklaro nga aktwal nga engkwentro ang nahitabo ug dili "salvaging" sukwahi sa pagduda ug espekulasyon sa pundok sa Muslim community.

Matud pa ni Ylanan nga iyang girespeto ang katungod sa mga lider sa Muslim community nga mo-speculate sa maong insidente apan alang kang Ylanan ang resulta sa independenteng medico legal gikan sa National Bureau of Investigation nga mi-awtopsiya sa lawas sa duha ka mga namatay base sa "scientific" nga paagi maoy nagtug-an sa matuod.

"Their speculations remains speculations while the scientific explanation tells otherwise since the latter is more reliable," pasabot pang Ylanan.

Mitumaw ang mga pagduda dihang dunay mga nakitang samad-samad sa walang pulsohan ang duha ka mga napatay nga gituuhang agi sa posas hinungdan nga gidudahang gi-"salvage" ang duha ug gihimoan lang og senaryo.

Apan sa awtopsiya ni Dr. Rene Cam sa NBI-7, ang samad diha sa walang pulso sa duha wala makuha atol sa pinusilay kundili mga samad nga nakuha human na sila namatay nga gituohang posibleng nakuha atol sa paghipos sa ilang lawas.

Nasuta usab nga walay igo sa ulo ang duha gawas lang sa usa kanila nga makatulo maagii og bala ang kasing-kasing, lagyo usab ang samad sa ilang lawas ug walay nakitang "tattoong" diha sa ilang lawas nga timailhang gipusil sila og dul-it.

Samtang usa ka dili buot mopailang opisyal sa kapolisan ang mitug-an nga ang nakuhang latent print diha sa bomba nga iya ni Usop diha makuha ilawom sa nasapawan sa electrical tape nga gibulibod sa bomba nga nagpakitang di "planted" ang fingerprint.

Gibutyag usab ni Sr. Supt. Lani-O Nerez nga si Usop ug Ulama manag-agaw , samtang ang padayon pang gipangitang kauban nila nga si Dino Amor Rosalejos Pareja alyas Khalil Pareja kinsa maoy gidudahang taga dinhi sa Sugbo bayaw sa founder sa RSM nga si Hilarion del Rosario Santos alyas Ahmad Santos.

Laing gipangita mao ang usa ka Ali Tarik kinsa gidudahang kauban sa mga suspek.

Matud pa nga si Pareja taga Sorsogon , nakaeskuyla sa usa University of the Philippines og kolehiyo sa usa sa mga prominenteng Catholic university ug mipuyo usab sa Zamboanga, kini maoy hinungdan nga suhito kini sa Sugbu.

Ang grupo dunay gihulagway sa kapolisan nga "close ties" sa teroristang Abu Sayyaf Gang nga nabantog na sa kidnapping for ransom ug pagpamatay og inosenteng sibilyan.