Tanang kargamento ipaagi na'g X-ray

Ipaagi na sa mga modernong X-ray baggage machine ang mga kargamento sa mga barko sa pantalan sa Sugbo sugod sa sunod buwan.

Gipahibawo sa tigpamaba sa Cebu Ports Authority, Aimee Sibul, nga mangabot na sa dili pa matapos ang buwan sa Mayo ang mga X-ray baggage machines nga ibutang sa mga terminal sa pantalan sa Sugbo.

Ang pahibawo ni Sibul dungan usab ang pagpasabot kon nganong nangolekta ang ilang buhatan og tag P10 isip terminal fee sa mga pasahero nga mosakay og barko.

Gipasabot ni Sibul nga daku ang investment sa CPA alang sa seguridad sa pantalan hinungdan nga nangolekta sila sa maong kantidad.

Sa iyang bahin gipasabot ni Kapitan Jesus Tolosa, ang civil security officer sa Philippine Ports Authority-Port District of the Visayas nga tanang pantalan sa nasud ang butangan sa maong mga X-ray baggage machines.

Matud pa ni Tolosa nga ang mga pasahero ipaubos usab sa inspeksiyon pinaagi sa pagpakita sa ilang valid identification cards ug passenger ticket.

Ang PPA naghulma usab og task force nga gilangkuban sa Philippine Coast Guard, Maritime Industry Authority, pondok sa mga tag-iya og barko ug mga port stakeholders.

Ang mga kompaniya sa barko nagbutang usab og kaugalingong sniffing dogs samtang himoon usab ang pagkapkap sa lawas sa mga pasahero sa barko sumala pa ni Tolosa.

Alang kang Tolosa, walay angay kabalak-an sa seguridad sa mga pantalan sa Kabisay-an sanglit wala pa'y dagkung dugoong insidenti nga nahitabo sa mga pantalan nga naglambigit sa mga terorista..