Tanod natagak sa brgy hall

Patay ang usa ka barangay tanod human kini maalimungawi samtang natulog ug natagak gikan sa kinababwang bahin sa barangay hall sa Zapatera ning dakbayan kagahapon sa kaadlawon.

Nabali ang pulsohan sa bukton ug posibleng nakaangkon usab og kadaut sa ulo ug ubang parte sa lawas ang biktimang si Arturo Rubinos, 62, minyo ug molupyo sa dalan Jakosalem ning dakbayan.

Sumala pa sa imbestigasyon sa Homicide Section ang biktima kasamtangang natulog uban sa iyang kaubang mga tanod ug samtang nagpaabot og alarma namahuway una diha sa roofdeck sa barangay hall nga gibana-banang 30 ngadto sa 40 ka tiil.

Ang asawa mismo ni Rubinos nga si Mercilinda kinsa diha usab sa barangay nianang pagkahitabo maoy nakadawat og tawag sa telepono gikan sa tagbalay diha sa luyo sa barangay hall nga si Castor Mendoza nga nagpahibalong natagak ang bana niini diha sa ilang atop.

Dali untang gidala sa Cebu City Medical Center ang biktima apan gideklarar kining dead on arrival sa mga mananambal.

Gituohang gialimungawan o ba kaha padulong mangihi ang biktima dihang nahagbong kini lahos ngadto sa balay ni Mendoza.

Si Kapitan Frank Benedicto mitug-an sa usa ka interbyu sa usa ka lokal nga sibyaanan nga 12 ka tuig nang tanod sa ilang barangay si Rubinos ug karon mao nay deputy chief sa mga tanod sa ilang barangay.