Brigada Eskwela sugdan sa M'daue

Ang division office sa Department of Education (DepEd) ug ang lokal nga kagamhanan sa Mandaue nga naglakip sa mga barangay official ug ang mga ginikanan sa kabataang nagtungha nagpasiugda sa programang Brigada Eskuwela karong tuiga.

Gitumong ang maong programa nga sugdan karong adlawa, Mayo 15 hangtod 20 niining tuiga pinaagi sa pagsusi sa mga guba nga edipisyo sa tulunghaan ug ang pagtinabangay sa pag-ayo niini.

Ang mga tulunghaang publiko sa high school ug elementarya sa Mandaue maoy susihon ug ayuhon lakip na ang mga lingkoranan, lawak saringan, atop, bungbong, pansayan ug uban pa.

Ang DepEd maoy nangulo sa programa ug ang mga ginikanan sa kabataang nagtungha sa matag tulunghaan mao usab ang nahimo niining kaabag.

Ang mga opisyales sa Parent-Teacher Community Association (PTCA ) ug ang mga magtutudlo sa matag tulunghaan moabag niini.

Si Mayor Thadeo Ouano sa dakbayan sa Mandaue ang hugtanon usab nga nagsuporta niini pinaagi sa pagpadala usab og mga tawo nga motabang sa pagpanday.