1 patay, 1 angol atol sa aksidente

Patay ang usa ka lalaki samtang laing usa ang naangol sa duha ka managlahing aksidente sa kadalanan dinhi sa dakbayan.

Ang namatay mao si Mario Suelto,47, taga Tormis Extension sa Sambag Dos ning dakbayan kinsa kasamtangang milabang sa kalsada sa dalan Gorordo sa Lahug dihang napunggit sa naghaguros nga PUJ gikan sa barangay Apas .

Sa imbestigasyon sa Cebu City Traffic Group ang biktima wala na makabantay sa pag-abot sa Isuzu elf nga pasaheruang gimaneho ni Geronimo Fuentes, 42, minyo taga Poblacion Malabuyoc.

Dali untang gidala ang biktima sa Vicente Sotto Memorial Medical Center apan dangtan og pila ka oras nakabsan kini sa kinabuhi samtang si Fuentes giaresto sa kapolisan.

Sa laing bahin, alas 4 pasado sa kaadlawon kagahapon nakaangkon og daghang kadaut sa kalawasan ang drayber sa traysikol nga si Edgar Soza Obedencio, 36, taga dalan Jaca, Inayawan ning dakbayan human kini madasmagi sa nawad-ag kontrol nga Isuzu Elf van nga gimaneho ni Roldan Casaño Requina, 25, taga dalan de Vera.

Sa imbestigasyon sa kapolisan, gikan pa sa habagatang bahin ang van subay sa South Road dihang pag-abot sa Kinasang-an-Pardo nawad-an og kontrol ang driver nga si Requina ug adto napunta sa kasugat nga traysikol sa biktima.

Ang biktima kasamtangang nagpaalim sa Cebu City Medical Center samtang gihikay na ang kasong isang-at sa suspek karong adlawa.