MJ gitanom sa kaang

Tulo ka mga dagkung kaang sa marijuana ang gitanom sa wala pa mailhing tawo sa giabandonar nga luna diha sa Barangay Poblacion Dalaguete ug nakompiskar sa kapulisan.

Ang kapulisan ning lungsod nakadawat og tawag gikan sa usa ka concerned citizen nga adunay mga tag-as nga marijuana sa maong dapit, hinungdan nga dali usab dayon kini mihimo ug operasyon ang hepe uban sa iyang mga sakop niini ug ilang gipang-ibot apan walay bisan usa nga tawo ang ilang nadakpan.

Ang mga punuan sa marijuana kasamtangan gibutang diha sa Police Station sa Dalaguete.

Si Police Senior Inspector Claro Cuyos Binatero sa pakighinabi sa Banat News niingon nga binuhatan kini sa mga way lingaw nga batan-on ang pagpananom og mga marijuana.

Giklaro hinoon ni Binatero nga padayon karon ang ilang pagmonitor sa kabukiran nga maoy sagad tamnan sa marijuana ug si kinsa ang nag supply niini ug binhi.