Laws sa Indon nga seajacker dad-on sa Indonesia

Patay'ng lawas sa Indonesian "seajacker" ibalik na karong adlawa sa ilang nasud sumala pa sa hepe sa Criminal Investigation and Intelligence Branch, samtang ang duha ka mga kaubang gitanggong gipailawom na sa proseso sa deportasyon sa pakig-alayon sa Bureau of Immigration 7.

Si Supt. Pablo Labra mitug-an sa Banat News kagahapon nga ipapauli na karong adlawa ang patay'ng lawas ni Johannis Taruc alyas Francisco Vidal. Si Vidal giatake sa sakit sa kasing-kasing. Matud pa ni Labra nga ang duha ka Indonesian nga sila si Oscar Dalegi ug Bernard Labine nga maoy nadakpang nag-aswat sa lawas ni Taruc pagawas sa usa ka hotel sa Guadalupe ning dakbayan niadtong milabay'ng semana gikatakdang ipa-deport pila ka adlaw gikan karon.

Ang CIIB nagpatabang na sa BID7 aron sa pag-imbestigar sa kaso sanglit walay napakitang dokumento ang duha ka buhing Indonesian ingon man ang giingong napulo pa nila ka kauban nga daling nangikyas.

Si Police Regional Office 7 director Eduardo Gador mibutyag sa media nga mga "seajacker" ang grupo ug miunay og kawat sa ilang barko gikan sa Indonesia ug gidala dinhi sa Pilipinas aron ibaligya.

Ang maong duha ka barko giingong nasigpatan sa Amlan Negros Oriental niadtong Mayo 2, apan si Cebu City Police Office director Melvin Gayotin mibutyag sa Banat News nga ila pa kining gisubay kung hain na karon kini mapunta.

"Dunay nakakita nga dunay giguyod nga barko dihang dapit, pero wala may nakahibalong kinawat diay 'to, kung nahibaw-an pa gibabagan na unta 'to," asoy pang Gayotin.

Ang Indonesian police maoy mikompirmar sa salaod nga gihimo sa grupo didto sa ilang nasud human makig-alayon ang kapolisan sa mga awtoridad sa Jakarta.

Giingong milawig ang grupo niadtong Abril 13 gikan sa pantalan sa Sumatra ug nahibaw-an lang nga naabot sila dinhi sa Sugbu dihang giatake sa kasing-kasing si Taruc.

Si Labra sa iyang bahin nagkanayon nga bugtong kalapasan nga nahimo sa grupo mao ang pagsulod dinhi sa Pilipinas nga walay dokumentos ug ila usab gitun-an kung dunay mapasakang kaso kabahin sa pagpanglimod sa duha sa pagkatawo sa ilang kaubang namatay.