Blackout hinungdan sa sunog

Gumikan sa blackout sa kuryente sa milabay'ng adlaw usa ka panimalay ang nasunog gumikan sa kandila didto sa sitio Kinalumsan, Gun-ob, Lapu-Lapu.

Base sa imbestigasyon ni SFO1 Jumid Alboro sa Lapu-Lapu City Fire department nasuta nga giduwaan sa usa ka bata ang kandila sa panimalay nga giabangan ni Vicente Hermocilla hinungdan sa pag-ulbo sa kalayo.

Matud pa ni SFO1 Alboro gumikan sa halapad nga brownout sa tibuok probinsiya sa Sugbo sa milabay'ng adlaw maoy nakapaaghat ni Hermocilla nga magsuga og kandila, apan wala kini makabantay nga usa sa iyang mga bata miduwa sa maong kandila hinungdan sa pagkasunog .

Dali ra nga napalong ang kalayo sa panimalay nga gipanag-iya ni Hilario Ramirez nga giabangan ni Hermocilla gumikan sa tabang sa mga residente sa maong dapit ginamit ang tubig sa kanal nga nahimutang duol sa panimalay sa nasunogan ug pag-abot sa bombero igo na lang silang mitiwas pagpakgang sa sunog.

Hinuon walay gikatahong nasamdan atol sa maong sunog ug kini nagbilin og danyos nga P50 mil.

Nadawat sa Lapu-Lapu City Fire Department ang alarma mga 10:25 sa milabay'ng buntag ug gipaubos kini sa 1st alarm diin nakontrolar kini sulod sa tres minutos.