Power plants ok bisan sa linog

Walay mga dagkong kadaut nga nasinati sa mga power plants nga gidumala sa National Transmission Commission (TRANSCO) ug sa National Power Corporation (NAPOCOR) sa pagkapawong niini atol sa nahitabong linog didto sa Leyte niadtong miaging adlaw.

Gibutyag sa tigpamaba sa Transco, Ben Ipil nga kagahapon sa buntag hingpit nang nahibalik sa normal ang suplay sa kuryente sa tibuok Sugbo.

Gipasabot ni Ipil nga usa lang ka protection set down ang nahitabong pagkapawong sa ilang mga planta sa Tongonan aron malikayan ang mga kadaot sa maong panghitabo.

Samtang gikonpirmar sa tigpamaba sa Visayan Electric Company (VECO) Ethel Natera nga walay kalabutan sa maong insidente ang mga nahitabong pagka-trip off sa suplay sa kuryente sa pipila ka mga dapit sa Pardo kagahapon sa buntag gumikan kay mugna lang kini sa usa ka tabanog nga nasangit sa linya sa kuryente.

Mihangyo si Natera ngadto sa publiko nga dili na magpataka og palupad og mga tabanog sa mga dapit nga duol sa linya sa kuryente.

Gipadayag ni Robert Go, sa Cebu Chamber of Commerce and Industry (CCCI) nga kadto lang mga gagmay'ng negosyante ang apektado og maayo sa lapad nga blackout dinhi sa Sugbo niadtong miaging adlaw.

Kini tungod kay wala kini nahimong trabaho ug napugos sa pagpapauli sa ilang mga empleyado tungod sa blackout.

Matud ni Go sagad sa mga dagko nga negosyante ang nagpabiling normal ang ilang operasyon bisan pa sa maong panghitabo gumikan kay duna man kiniy kaugalingong mga generator sets.