Panakop sa Mandaue PUJ wa mahinayon

Nagpadayon gihapon ang mga jeep de pasahero-an sa Mandaue nga rota sa pagpamasahero lahos sa uptown ug downtown area dinhi sa dakbayan sa Sugbo human wala makapatuman ang City Traffic Operation Management (CITOM) sa City Ordinance 1837.

Sa pagpakighinabi sa Banat News ngadto kang Ernie Largo sa Traffic Control System sa Citom gikonpirmar niini nga wala pa sila hingpit nga mopatuman sa maong ordinansa.

Kini tungod kay matud ni Largo wala pa usab sila makadawat og pormal nga kamanduan alang sa hingpit nga pagpatuman sa nahisgutang ordinansa.

Wala pa usab dinhi sa Sugbo ang hepe sa Traffic Group nga si Supt. Julius Cesar Gornez ug ang executive officer sa CITOM nga si Arnel Tancinco gumikan kay atua pa kini sa kaulohan alang sa usa ka opisyal nga biyahi ug unya pa sa Lunes sunod semana mahibalik.

Samtang gikonpirmar usab ni Konsehal Sylvan Jakosalem, tsirman sa committee on transportation nga wala lang una nila ihinayon ang pagpatuman sa maong ordinansa gumikan kay wala pa usab moluwat og pormal nga kamanduan si Mayor Tomas Osmeña.

Gipasalig hinuon ni Jakosalem nga mapatuman gyud karung semanahuna ang maong balaod ug gipaabot na lang karon nila ang pormal nga kamanduan gikan sa mayor.

Ubos ning maong ordinansa mahimo nang dakpon ug i-impound ang mga PUJ unit sa Mandaue kun padayon kining mosulod ug mamasahero dinhi sa kinapusoran sa dakbayan sa Sugbo sa ikatulo ka higayon nga madakpan.

Ang unang pagkalapas ning maong ordinansa pabayron og multa nga P300 ug ikaduha P500 ug sa ikatulo P700 ug ma-impound pa ang unit niini.