16-anyos nahug sa mini-bus, patay

Patay ang usa ka minor de edad human matagak sa dihang mikabyon sa usa ka Isuzu mini bus sa dakbayan sa Toledo.

Si Michael Reviera, 16, batan-on, molupyo sa Campo 10, Media Once, Toledo City misulay sa pag-angkas sa mini bus sa national highway apan wala kini nakakupot og tarong hinungdan nga nawad-an siya og kontrol ug nahulog gikan sa sakyanan.

Ang mini bus gipanag-iya ni Antonio Canonigo ug gidrayban ni Arnel Canonigo, 29, minyo, pulos residente sa Malubog, Toledo City.

Ang mini bus gikan sa Malubog ug padulong sa Poblacion apan didto sa highway nahitabo ang maong insidente.

Ang biktima gidali pagdala sa Toledo City Hospital aron tambalan apan gideklara nga dead on arrival ni Dr. Ulysses Rallon.

Ang drayber boluntaryo mitahan sa kapolisan sa Toledo.