Newsboy gibunalan sa kainom, namatay

Grabe ang kadaut sa kalawasan sa usa ka newsboy kinsa gibunalan sa iyang gikainom nga maoy nakaingon sa hinanali niining kamatayon sa miaging gabii sa San Isidro, Talisay.

Ang biktima mao si Edgar Fuentes, 38-anyos, ulitawo sa dalan Bonifacio Bacalso, Mambaling, siyudad sa Sugbo.

Ang suspetsado mao si Artemio Paraiso, hingkod ang panuigon ug nagpuyo sa maong dapit.

Si PO2 Rey Lufranco miingon nga nakig-inom si Fuentes uban sa mga higala dihang kalit lang nga gibunalan ni Paraiso.

Matud pa niya nga ang suspetsado ilang nadakpan sa follow-up nga ilang gihimo ug gitanggong kini sa bilanggoan.

Si Pastor Fuentes nga amahan sa biktima miingon nga kusog gayod moinom iyang anak apan dili kini palaaway.

Dugang pa niya nga bisan asa lamang makig-inom ang biktima sa higayon nga mahuman na kini paghatod sa mga pamantalaan apan wala gayod siya'y nahibaw-an nga nakakita kini og kontra.