... dili tagdon sa CIDG kun way mobarug

Dili tagdon sa Criminal Investigation and Detection Group 7, ang nanggawas nga poison letter kabahin sa kaso sa pagpatay ni Cebu City Market Administrator Elpidio dela Victoria nga nagduhig karon sa pangalan ni Provincial Police director Vicente Loot ug asawa niining si Mayor Maria Luisa Loot sa Daanbantayan.

Matud pa ni Derilo sa pakighinabi sa Banat News nga hatagan lang nila og panahon ug pagtagad ang tawong misuwat niini kun personal nga mopatim-aw ug magpaila diha sa ilang buhatan aron paghatag og mga lig-ong impormasyon nga magpamatuod sa iyang pangangkon sa suwat, gumikan kay makaapekto kini sa kasamtangang kaso nga gipasaka batok kang SPO1 Marcial Ocampo.

Giangkon ni Derilo nga pila na ka adlaw ang milabay duna na silay daghang nadawat nga suwat nga nagduhig sa pangalan sa mga Loot ug namasangil nga "fallguy" ra gyud si Ocampo ug nagkunsabo ra ang Police Regional Office 7, CIDG 7 ug CPPO aron iduot si Ocampo ug malayo ang atensyon gikan sa mga Loot.

Dihang ilang gisubay ang mga suwat nga may mga pangalan ug lagda ingon man pinuy-anan sa misuwat bakak kini ug dili tinuod nga diha sila magpuyo.

Si Loot sa iyang bahin kusganong mihimakak sa maong pasangil ug mitug-an nga nasayod na siyang daan nga daghang mga tawong buot nga lumpagon ang kredibilidad sa iyang pamilya (basaha ang laing estorya nga interbyu kang mayor Loot).

Giangkon usab ni Derilo nga nagkunsabo gyud sila sa PRO7, CPPO , Talisay Police Station ug CIDG7 isip lead agency gumikan kay usa man ka Task Force ang ilang giumol nga gilangkuban sa maong mga buhatan aron pagsubay sa kaso ni dela Victoria, gawas niana wala nay laing motibo.

Gani usa sa mga suwat nga nadawat sa CIDG 7 mitumbok gyud sa usa sa mga polis sa CIDG7 nga si SPO1 Jojo Montesclaros nga maoy gunman, duna pay laing suwat nga nagtudlong laing tawo ang mipusil ni dela Victoria.

Apan si Derilo sa iyang bahin nagtuong lig-on ang kaso batok ni Ocampo gumikan kay unom ka mga testigo ang miila kaniya , duha kanila ang niggukod kang Ocampo dihang padulong na kini og ikyas usa niini paryente sa asawa ni dela Victoria.