BID-7 duda sa 2 Indons

Ang kadagkoan sa Bureau of Immigration and Deportation-7 dako og pagtuo nga mga terorista ang duha ka mga Indonesian national nga miabot dinhi sa dakbayan sa Sugbo ug nasikop sa mga sakop sa kapolisan sa milabay'ng adlaw nga nagyayong og patay'ng lawas sa usa ka Filipino.

Si BID 7 Board of Special Inquiry Chief, Atty. Leobarlo Enad nga nahinabi sa Banat News miingon nga iya nang gisusi sa ilang buhatan ug sa ilang ulohang buhatan ang rekords nila ni Bernard Labene ug Oscar Dalige, mga Indonesian nationals apan walay nakitang ebidensiya sa ilang legal nga pagsulod dinhi.

Matud pa ni Enad nga siya ug ang pagtuo nga kining mga tawhana mga terorista nga mianhi dinhi sa Sugbo agi sa "backdoor" hinungdan nga wala silay mga dokumento nga ikapakita.

Subay niini migamit usab sila og ngalan sa Pilipino pagsulod dinhi sa nasud ug dili gyud kini magpakita sa ilang mga papeles aron dili mabisto ang ilang mga rekord diin sila maggikan nga nasud.

Matud pa ni Enad nga dili pa sila makahilabot sa maong mga lanyaw gumikan kay anaa pa kini sa kamot sa kapolisan ug andam sila modawat kun i-turn-over kini ngadto sa ilang kustodiya.

Gipasalamatan usab ni Enad ang mga personnel sa hotel diin magsaka ang mga Indonesian gumikan sa ilang pagtaho dayon ngadto sa kapolisan sa mga kadudahang lihok sa ilang mga langyaw nga kliyente.

Nanghinaot si Enad nga ang tanang mga Sugbuanon adunay maayong koordinasyon ngadto sa kapolisan ug sa BID 7 sa mga katahapang lihok sa mga langyaw sa ilang dapit aron kalikayan ang disgrasya.

Kahinumduman nga si Labene ug Dalige mga Indonesian national nasikop sa kapolisan sa usa ka hotel sa Guadalupe nga dunay giputos nga patay'ng lawas sa ilang kauban nga maoy nakaaghat sa mga personnel sa maong hotel nga motawag sa kapolisan hinungdan sa pagkasikop niini.