UC nagtanyag environmental law training program

Ang University of Cebu (UC) bag-o lang nagtanyag og Environmental Law Training para sa mga abogado.

Si Atty. Gloria Estenzo Ramos, organizer sa environmental training program mibutyag sa Banat News nga ang UC maoy ikaduhang gihatagan og mandatory continuing legal education program (MCLE) accreditation isip service provider sa maong training.

Ang University of San Carlos maoy unang nakadawat sa nahisgutang accreditation ug maoy unang service provider sa environmental training.

Ang MCLE usa ka mandatory program sa Korte Suprema ug ang mga abogado maoy gipili nga bansayon niini tungod kay sila man maoy suhito kabahin sa balaod.

Apan matud ni Ramos nga dili tanang abogado ang suhito kabahin sa environmental law hinungdan nga giimplementar ang maong programa.

Sulod sa tulo ka tuig ang mga abogado kinahanglang mokuha og 36 ka unit sa nahisgutang environmental law training.

Ang nagkalainlaing grupo sa organisasyon sa mga abogado kinahanglan nga mopili og napulo ka miyembro nga mosalmot sa maong training.

Dili lang dinhi sa Sugbo nga dunay ipahigayon nga training lakip na usab ang Visayas ug Mindanao ug gilauman usab nga makapahigayon sila og training sa Luzon.

Si Ramos midungag nga ang unang obligasyon sa mga abogado mao ang pagprotehir sa katilingban ug dili lang manlaban sa ilang mga kliyente.

Karong Mayo 18 ngadto sa 20 niining tuiga diha sa Bantayan Island Sea Camp sa Santa Fe, Cebu adunay ipahigayong environmental training sa mga abogado ug salmotan usab kini sa kagamhanan, sa corporate sector ug academe.

Ang Integrated Bar of the Philippines (IBP), Law of Nature Foundation, Coastal Conservation and Education Foundation, Cebu Lady Lawyers Association (CELLA), UC Environmental Center, KALIKUPAN Law Group, USJR College of Law, uban sa Smart Communication, Energy & Clean Air Project (ECAP) sa US-AID, Cebu Uniting for Sustainable Waters (CUSW) ug Santa Fe Beach Resort nagkahiusa sa paghatag og ayuda aron mapalambo ang maong kalihukan.

Sa Mayo 20 ipahigayon usab ang unveiling sa marker isip handumanan ni kanhi bantay dagat director ug market supervisor Elpidio "Jojo" Dela Victoria Jr. ug adunay ipahigayong paglagda sa memorandum of agreement tali sa stakeholders sa Visayan Sea.

Ang maong kalihukan pangulohan ni Gobernador Gwendolyn Garcia.