Ang biktima nga mitaho sa kapolisan sa Station 5 sa Mandaue City Police Office mao si Cristopher Tautho Dalumpines, 30, ulitawo nga nagpuyo sa dalan Katipunan, Labangon Sugbo, drayber sa Salve taxi nga adunay plaka nga GXB 101.
Matud pa ni Dalumpines nga tulo ka mga lalaki nga hingkod na ang panuigon misakay sa iyang gimanihong taxi sa Basak ning dakbayan, ug nagpahatod sa MEPZ dakbayan sa Lapu-Lapu.
Pag-abot sa UN Ave. dakbayan sa Mandaue, ang naglingkod sa atubangan sa taksi maoy mition kaniya ug mideklarar og tulis hinungdan nga wala siyay laing nahimo gawas sa paghatag sa iyang kuwarta balor P3,140.
Wala pa gyud matagbaw ang mga tulisan gipakanaog siya sa maong taxi ug gidala kini padulong sa dakbayan sa Lapu-Lapu hinungdan sa iyang pagtaho sa kapolisan sa Station 5 sa MCPO.
Matud pa ni PO2 Vicente Gila sa Station 5 nga sa ilang gihimong hot pursuit operation pakyas kini sa pagsubay sa gidad-an sa mga tulisan. Dako usab ang pasalamat ni Dalumpines nga wala siya patya sa mga tulisan.