Babayeng german gi-hostage sa sabog

Usa ka 45 anyos nga Filipino-German nga babaye gi-hostage sa usa ka lalaking gituohang hubog ug sabog sa gidiling drogas sulod sa kapin tulo ka oras diha sa ilang panimalay.

Ang biktima giilang si Daya Grossman, molupyo diha sa North Town Homes sa Talamban ning dakbayan kinsa gitiunan og mahait nga hinagiban sa suspek nga si Reymar Transporte, 28, nga taga dalan Bacayo, Guadalupe ning dakbayan ug taga Oroquita City sa Misamis Occidental.

Ang grupo sa Special Weapons And Tactics (SWAT) pinanguluhan ni SPO2 Jose Tolosa miresponde sa nahisgutang lugar human makadawat og tawag gikan sa gwardiya sa maong subdivision nga si Alfredo Genson pasado alas 3:40 sa kaadlawon kagahapon.

Ang biktima gikatahong maoy nakadungog sa kasikas diha sa silong sa ilang balay maong gisusi kini diha sa ubos apan kalit lang nga gitiunan sa suspek og kutsilyo ang naulahi.

Ang kauban sa biktima diha sa balay nga nakadungog sa kasikas maoy misusi ug mitug-an ngadto sa ilang gwardiya kinsa mao usab ang mipahibalo sa kapolisan.

Sila si Tolosa ug mga polis sa Talamban police station maoy nakig-negosasyon sa suspek hangtud pagkaalas 5:45 sa buntag gilapoy ang lawas niini ug mitahan sa iyang kaugalingon.

Ang imbestigador sa Talamban nga si SPO1 Epifanio Sanjorjo mihimo na og dugang imbestigasyon sa maong kaso kung unsay rason sa pagwala ug pagpang-hostage sa suspek.

Samtang si Supt. Melvin Gayotin mimando na sa Mobile Patrol Group sa pag-esplikar kung nganong wala dayon nila pahibaw-a si Gayotin sa insidente nga standard operating procedure na sa CCPO nga kung dunay dagkong panghitabo pahibaw-on dayon ang direktor sa kapolisan.

Ang biktima luwas na hinuon sa peligro dihang nahuman ang insidente samtang ang suspek kasamtangan pa karong gitanggong sa karsel sa Talamban police station.