Ludo sa Sawang Calero pahawaon

Ang Korte Suprema mihukom nga ipatangtang sa Ludo and Lu Ym Corporation ang ilang gihimong improvements sa 8,485 metro kwadrado nga lote diha sa Barangay Sawang Calero niining dakbayan.

Ang maong lote kanhi foreshore o baybayon nga gitukoran og bodega sa kopras, cylindrical tank sa coconut oil ug automotive shop sa maong establisamento.

Ang nahisgutang lote gi-award nga foreshore lease pabor sa Aznar Brothers Realty Company nga nalambigit sa patigayon nga buy-and-sell sa mga real properties, livestock ug agricultural business.

Niadtong Hulyo 21, 1965 ang Ludo mipahigayon og improvement sa maong luna ug gitukoran kini sa ilang bodega ug hangtod karon ang maong kompaniya nagpadayon pa gihapon sa ilang negosyo diha sa lugar.

Matud sa Ludo nga aduna silay permit nga gi-isyu sa Bureau of Lands sa pag-okupar nila sa luna, apan ang nahisgutang permit nasuta sa korte nga wala sa rekord.

Niadtong Hulyo 21, 1974 ang Director of Lands miluwat og desisyon sa pagrebokar sa gihatag nga pabor sa Aznar Brothers ug nagmando sa pag-reauction sa maong lote apan ang Aznar Brothers miduso og motion for reconsideration ug ang maong mosyon gibasura.

Ang Aznar Brothers miapela sa Ministry of Natural Resources niadtong Septiyembre 18, 1986.

Ang MNR pinaagi sa Assistant Secretary for Legal Affairs miluwat og desisyon sa pagsubli sa hukom sa Director of Lands aron mapasaka ang pag-award sa maong luna pabor sa Aznar Brothers ug nagmando sa Ludo nga ipatangtang ang tanan nilang gibuhat nga improvement.

Ang Korte mibasura sa petisyon nga giduso sa Ludo tungod sa kakuwang niini ug gibug-aton.

Niadtong Hulyo 20, 1994 ang Korte miisyu og resolusyon nga nagbasura sa petisyon sa Ludo tungod sa pagkapakyas niini og bayad sa saktong kantidad sa sheriff's fees ug clerks commission nga P202 ug kapakyas sa pagpresenta og kamatuoran nga dunay nahimong sayop nga desisyon ang Court of Appeals.

Niadtong Pebrero 13, 1995 ang Ludo miduso og instant nga motion para isuspenso ang enforcement sa desisyon sa Land Management Bureau aron i-rebid ang luna.

Ang Land Management Bureau mi-refer sa maong mosyon sa Secretary sa Department Environment Natural Resources (DENR) niadtong Nobiyembre 22, 1995.

Tungod sa rason nga ang nahisgutang motion usa ka paagi sa pagkalangan sa maong kaso gibasura kini.

Gi-dismiss usab sa Office of the President niadtong Enero 9, 1997 ang giduso nga petisyon sa Ludo niadtong Nobiyembre 22,1995 tungod sa kakuwang niini og gibug-aton.

Base sa findings sa Court of Appeals sa Ministry of Natural Resources, ang Ludo wala hatagi og pagtugot nga muokupar sa luna tungod sa provisional permit nga giisyu sa Bureau of Lands ug ang maong permit wala sa rekord.